IN THE LAND OF BROTHERS (2024)

 FILM : IN THE LAND OF BROTHERS (2024)

COUNTRY : IRAN

GENRE : DRAMA

DIRECTOR : RAHA AMIRFAZLI , ALIREZA GHASEMI

    യുദ്ധങ്ങളും, രാഷ്ട്രീയ അസ്ഥിരതകളുമെല്ലാം മനുഷ്യനെ തള്ളിയിടുന്നത് പലതരം ജീവിതാവസ്ഥകളിലേക്കാണ്. സങ്കല്പിക്കാനാവാത്ത ജീവിതപരിസരങ്ങളിൽ എരിഞ്ഞു തീരുവാനും, അടയാളങ്ങളില്ലാതെ അലിഞ്ഞു തീരുവാനും വിധിക്കപ്പെട്ട നിരവധി ജീവിതങ്ങളേയും മനുഷ്യാവസ്ഥകളെയും ഓർമിപ്പിക്കുന്നു ഇറാനിയൻ സിനിമയായ IN THE  LAND OF BROTHERS. 

    അഭയാർത്ഥി ജീവിതത്തിന്റെ പലതരം ദുർഘട സന്ധികളിലൂടെ സഞ്ചരിക്കുന്ന സിനിമ വിവിധ ദശകങ്ങളിലേയ്ക്ക് കാലൂന്നുമ്പോഴും  ആശങ്കകളും, സ്വത്വ പ്രതിസന്ധികളുമെല്ലാം കഥാപാത്രങ്ങളെ നിഴലുപോലെ പിന്തുടരുന്നു എന്ന യാഥാർഥ്യം തെളിഞ്ഞു നിൽക്കുന്നു. പരസ്പര ബന്ധമുള്ള മൂന്നു കഥാപാത്രങ്ങളുടെ ജീവിതങ്ങളെ വ്യത്യസ്ത ടൈംലൈനിൽ അവതരിപ്പിക്കുന്നതിലൂടെ അഭയാർത്ഥി ജീവിതങ്ങളുടെ സാമൂഹികമായ പരിണാമവും അനാവൃതമാകുന്നു. മുഹമ്മദും, ലൈലയും, ക്വസവുമെല്ലാം നടന്നു തീർത്ത പാതകളിൽ ദുഃഖസാന്ദ്രമായ ശേഷിപ്പുകൾക്കപ്പുറം ജീവിതത്തിന്റെ  വർണ്ണങ്ങളെ കണ്ടുമുട്ടാനാവുന്നില്ല. സാഹചര്യങ്ങൾ അടിച്ചേൽപ്പിച്ച അവരുടെ ജീവിതത്തിലെ നിസ്സഹായതയുടെ / നിരാശയുടെ / തകർന്ന സ്വപ്നങ്ങളുടെ / അസ്തമിച്ച പ്രതീക്ഷകളുടെയെല്ലാം  പതിഞ്ഞ തേങ്ങലുകൾ അവരിൽ തന്നെയൊടുങ്ങുന്നു.

    ചൂഷണങ്ങളും , നഷ്ടങ്ങളും, വേദനകളുമെല്ലാം ജീവശ്വാസം പോലെ ഒപ്പം നടക്കുന്ന അഭയാർത്ഥി ജീവിതത്തിന്റെ  വേറിട്ട കാഴ്ചകളിലേക്ക് ക്യാമറ തിരിക്കുന്ന ഈ സിനിമ  മനസ്സിൽ ഒരു നൊമ്പരമായി അവശേഷിക്കുന്നു. കഥാപാത്രങ്ങളുടെ മികച്ച പ്രകടനങ്ങളും, അളന്നു മുറിച്ച സംഭാഷണങ്ങളും , മികച്ച സിനിമാറ്റോഗ്രഫിയും, ശ്രദ്ധയാകർഷിക്കുന്ന സൗണ്ട് ട്രാക്കുമെല്ലാം ഈ സിനിമയെ മികച്ച ദൃശ്യാനുഭവമാക്കുന്നു.

THE GREAT YAWN OF HISTORY (2024)

 FILM : THE GREAT YAWN OF HISTORY (2024)

COUNTRY : IRAN

GENRE : DRAMA

DIRECTOR : ALIYAR RASTI

    പ്രതീക്ഷകളാണ് മനുഷ്യനെ മുന്നോട്ട് നയിക്കുന്നത്. അതിന്റെ തീവ്രതയെ നിർണ്ണയിക്കുന്നത് പിന്നിട്ട അനുഭവങ്ങളും, വഴികളും കൂടിയായിരിക്കും. സ്വപ്നത്തിൽ ആവർത്തിച്ചു വരുന്ന ഗുഹയെയും, നിധിയെയും തേടിയിറങ്ങാൻ ബെയ്തുള്ള തീരുമാനിക്കുന്നതും പ്രതീക്ഷകളുടെ ചിറകിലേറി തന്നെയാണ്. അയാൾക്ക് ഒരു സഹായിയായി ഷോജ കൂടെ ചേരുമ്പോൾ അവരുടെയും സിനിമയുടെയും യാത്രയാരംഭിക്കുകയാണ്.

    തന്റെ സഹായിയെ കണ്ടെത്തുന്നതിനായി ബെയ്തുള്ള നടത്തുന്ന ശ്രമവും, അഭിമുഖങ്ങളും സിനിമ കേവലം ഒരു ട്രഷർ ഹണ്ട് അല്ല എന്ന് ആദ്യമേ പറഞ്ഞുവെയ്ക്കുന്നു. മതവും, ധാർമ്മിക ബോധങ്ങളും മനസ്സിൽ നിറഞ്ഞു നിൽക്കുന്ന ബെയ്തുള്ള സഹായിയെ വിരുദ്ധ ധ്രുവത്തിൽ നിന്നും കണ്ടെടുക്കുന്നത് യാദൃശ്ചികമല്ല എന്ന് പ്രേക്ഷകനും വഴിയേ ബോധ്യപ്പെടുന്നുണ്ട്. ഇറാനിലെ മലനിരകളിലും, മരുഭൂമികളിലൂടെയും ഇക്കോ ടൂറിസ്റ്റുകൾ എന്ന വ്യാജേന ഗുഹകൾ തേടിയലയുന്ന ഇരുവർക്കുമിടയിലെ മൗനം വെടിയുന്ന നിമിഷങ്ങളിലെ സംഭാഷണങ്ങൾ  അവരെയും സിനിമയെയും കൂടുതൽ മനസ്സിലാക്കാനുള്ള സൂചനകളാവുന്നു. ധാർമ്മിക ബോധം, സാമൂഹികാവസ്ഥ, സുരക്ഷിതത്വം, സാമ്പത്തികം എന്നിങ്ങനെ സിനിമയ്ക്കൊപ്പം ചിന്തയിലൂടെ മിന്നിമറയുന്ന തോന്നലുകൾ സിനിമയുടെ ജീവനാഡിയും , തുടർച്ചയുമായി പ്രേക്ഷകനിലേക്ക് പടർത്താൻ സംവിധായകനായിട്ടുണ്ട് എന്ന് ഉറപ്പിച്ചു പറയാം.

COMMITMENT HASAN (2021)

 FILM : COMMITMENT HASAN (2021)

COUNTRY : TURKEY

GENRE : DRAMA

DIRECTOR : SEMIH KAPLANOGLU

    മനുഷ്യ മനസ്സിന്റെ സൂക്ഷ്‌മ തലങ്ങളെയും, ഭാവങ്ങളെയും വിവിധ കഥാപാത്രങ്ങളിലൂടെ മനോഹരമായ ദൃശ്യങ്ങൾക്കിടയിൽ ദൃശ്യവത്കരിച്ചിരിക്കുന്ന തുർക്കിഷ് സിനിമയാണ് സെമീഹ് കപ്ലനോഗ്ലുവിന്റെ COMMITMENT HASAN. പിതാവിൽ നിന്നും പാരമ്പര്യമായി ലഭിച്ച കൃഷിയിടത്തിൽ കൃഷിചെയ്ത് ജീവിക്കുകയാണ് ഹാസനും കുടുംബവും. ഭാര്യയും, വേലക്കാരിയായ പെൺകുട്ടിയുമാണ് വീട്ടിലെ നിലവിലുള്ള അംഗങ്ങൾ. ഹാസന്റെ കൃഷിയിടത്തിന്റെ  മധ്യത്തിൽ വലിയ ഒരു ഇലക്ട്രിക് പോസ്റ്റ് സ്ഥാപിക്കാനിരിക്കുകയാണ് എന്ന വിവരം അയാളെ അസ്വസ്ഥനാക്കുന്നിടത്തു നിന്നാണ് സിനിമ താളം കണ്ടെത്തുന്നത്. 

    തന്റെ കൃഷിയിടം നഷ്ടമാകുമെന്ന ആശങ്കയിൽ അതിന് തടയിടാനുള്ള അയാളുടെ ശ്രമങ്ങൾക്കൊപ്പം മനസ്സുകൊണ്ട് നമ്മളും ഐക്യപ്പെടുന്നു. എന്നാൽ, ഹാസന്റെ മുഖത്ത് തെളിയുന്ന നിസ്സഹായതയ്ക്കപ്പുറം അയാളുടെ ഉള്ളിലുള്ള സ്വാർത്ഥതകളെ നമുക്ക് പതിയെ കണ്ടുമുട്ടാനാവുന്നു. ഭാര്യ എമിനും ഇക്കാര്യത്തിൽ അയാളുടെ സ്വഭാവത്തിന്റെ ഓരത്തു നിൽക്കുന്നവളാണെന്ന് ചില സീനുകൾ അടിവരയിടുന്നുണ്ട്.

    തിരിച്ചറിവുകൾക്കും, പ്രായശ്ചിത്തത്തിനും , വൈകിയെത്തുന്ന നല്ല തോന്നലുകൾക്കുമെല്ലാം മുകളിൽ ഭൂതകാലത്തിന്റെ നിഴൽ മായ്ച്ചു കളയാനാവാത്തവിധം പതിഞ്ഞു കിടക്കുമെന്ന് സിനിമ കാണിച്ചുതരുന്നു. മെക്കയിലേക്ക് തീർത്ഥാടനത്തിനായി ഇരുവർക്കും അവസരം ലഭിക്കുന്നതോടെയാണ് അവനവനിലേക്കും, പിന്നിട്ട കാലങ്ങളിലേക്കും, ചെയ്തികളിലേക്കും ഹാസന്റെ മനസ്സ് സഞ്ചരിച്ചു തുടങ്ങുന്നത്. സ്വാർത്ഥതയിൽ ശൂന്യമാകുന്ന ഹൃദയവും, അന്ധമാകുന്ന കണ്ണുകളും , നിർവ്വികാരതയെ പുൽകുന്ന മനസ്സും ജീവിതത്തിലെ വിലപ്പെട്ട പലതിനെയും വീണ്ടെടുക്കാനാവാത്ത വിധം അകലങ്ങളിലേക്ക് നഷ്ടപ്പെടുത്തുമെന്ന് സിനിമ പറഞ്ഞുവെയ്ക്കുന്നു.

    അഭിനേതാക്കളുടെ മികവുറ്റ പ്രകടനങ്ങൾക്കൊപ്പം സിനിമയുടെ ആകർഷണീയതയായി നിലകൊള്ളുന്നത് ഗംഭീരമായ സിനിമാറ്റോഗ്രാഫിയാണ്‌. ഗ്രാമീണതയുടെ തെളിമയിൽ അത്രയൊന്നും തെളിച്ചമില്ലാത്ത മനസ്സിന്റെ സഞ്ചാരപഥങ്ങളെ വിവിധ സാഹചര്യങ്ങളിലൂടെ വരച്ചിടാൻ സംവിധായകനാകുന്നു എന്നതാണ് സിനിമയുടെ മേന്മ.

HONEYGIVER AMONG THE DOGS (2016)

 FILM : HONEYGIVER AMONG THE DOGS (2016)

COUNTRY : BHUTAN

GENRE : MYSTERY

DIRECTOR : DECHEN RODER

    ഭൂട്ടാനിലെ പച്ചപുതച്ച മലനിരകളുടെ പശ്ചാത്തലത്തിൽ ആരംഭിക്കുന്ന HONEYGIVER AMONG THE DOGS എന്ന പതിഞ്ഞ താളത്തിലുള്ള മിസ്റ്ററി സിനിമയെയാണ് ഈ കുറിപ്പിൽ പരിചയപ്പെടുത്തുന്നത്. ഒരു ബുദ്ധിസ്റ്റ് സന്യാസിനിയുടെ തിരോധാനവുമായി ബന്ധപ്പെട്ട് അന്വേഷിക്കാനെത്തിയതാണ് കിൻലി എന്ന ഡിറ്റക്ടീവ്. പ്രധാന പ്രതിയെന്ന് സംശയിക്കുന്ന 'ചോദൻ' എന്ന നിഗൂഢത നിറഞ്ഞ സ്ത്രീയെ അന്വേഷിച്ചെത്തിയിരിക്കുന്ന 'കിൻലി' തന്നെ അവൾക്കൊപ്പം ഒരു യാത്രയാരംഭിക്കുകയാണ്. ഈ തിരോധാനത്തിനു പിറകിലുള്ള യാഥാർത്യം തേടുകയാണ് അയാളുടെ ലക്ഷ്യം. സാമൂഹികമായ ചിന്തകളും, ദുരകളും, സ്പിരിച്വൽ എലമെന്റുകളും സിനിമയിൽ കണ്ടെടുക്കാവുന്നതാണ്. വളരെ പതിഞ്ഞ താളത്തിൽ ഉദ്വേഗം നിറയുന്ന നിമിഷങ്ങളില്ലാതെ അവതരിപ്പിച്ച ഒരു സിംപിൾ മിസ്റ്ററി എന്ന് ഒറ്റവാക്കിൽ പറയാം.

SIRAT (2025)

FILM : SIRAT (2025)

COUNTRY : SPAIN

GENRE : DRAMA !! ADVENTURE !! MYSTERY

DIRECTOR : OLIVER LAXE

      ഒരു റോഡ് മൂവി എന്ന് ഒറ്റവാക്കിൽ പറഞ്ഞുവെക്കാവുന്ന ഒന്നല്ല SIRAT. മകളെ അന്വേഷിച്ചു മൊറോക്കൻ മരുഭൂമിയിൽ എവിടെയോ നടക്കുന്ന ഒരു സംഗീത പരിപാടിയിൽ എത്തിയിരിക്കുകയാണ് ലൂയിസും അയാളുടെ മകൻ എസ്തബാൻ എന്ന ബാലനും. മകളെ കണ്ടെത്താൻ കഴിയാത്ത അയാൾ അവിടെയുള്ള ചിലരിൽ നിന്നും മറ്റെവിടെയോ നടക്കുന്ന വേറെയൊരു പാർട്ടിയെ കുറിച്ചറിയുന്നു. മകളെ കണ്ടെത്താമെന്ന പ്രതീക്ഷയോടെ അയാൾ ചിലയാളുകൾക്കൊപ്പം യാത്ര തുടരാൻ തീരുമാനിക്കുകയാണ്. മരുഭൂമിയുടെ ശാന്തവും, രൗദ്രവുമായ മുഖങ്ങളെല്ലാം തെളിയുന്ന ഭൂപ്രതലങ്ങളിലൂടേയും , വരണ്ട മലനിരകളിലൂടെയും നടത്തുന്ന യാത്രക്കിടയിൽ സംഭവിക്കുന്ന അപ്രതീക്ഷിതങ്ങളായ സംഭവ വികാസങ്ങളിലൂടെയാണ് സിനിമയും നീങ്ങുന്നത്. സിനിമയിലെ കഥാപാത്രങ്ങളും , സംഭാഷണങ്ങളുമെല്ലാം യാത്രയ്‌ക്കൊപ്പം നമ്മുടെ ചിന്തകളെ സ്പർശിച്ചുകൊണ്ടാണ് മുന്നേറുന്നത്. സിനിമയുടെ കഥാപരിസരം സാധ്യമാക്കുന്ന തീക്ഷ്‌ണമായ വിഷ്വലുകൾക്ക് മുകളിൽ നിൽക്കുന്നതാണ് സിനിമയുടെ പശ്ചാത്തല സംഗീതം. ഹൃദയമിടിപ്പ് പോലെ സിനിമയുടെ ഗതിയോടും, സിനിമയുടെ നിഗൂഢാത്മകതയോടും ചേർന്ന് നിൽക്കുന്ന സംഗീതം വേറിട്ട അനുഭവമേകുന്നു. യുദ്ധം, ജീവിതം, കുടുംബം, മരണം എന്നിങ്ങനെ വ്യത്യസ്ത വിഷയങ്ങളിലേക്ക് സിനിമ വഴിവെട്ടിപ്പോകുന്നുണ്ട്. ഈ സിനിമ ഇതര സിനിമകളിൽ നിന്നും അടർന്നു നിൽക്കുന്നത് വേറിട്ട കാഴ്ചകളും, ശബ്ദവിന്യാസങ്ങളും അനുഭവിപ്പിക്കുന്ന പ്രത്യേകമായ ഒരു ദൃശ്യ-ശ്രാവ്യ അനുഭവം പ്രേക്ഷകനുണ്ടാവുന്നത് കാരണമാണ്.

WHO DO I BELONG TO

 FILM : WHO DO I BELONG TO

GENRE : DRAMA

COUNTRY : TUNISIA

DIRECTOR : MERYAM JOOBEUR

              "ദൃശ്യങ്ങൾ സംസാരിക്കുന്ന, ആശയം കൊണ്ടും അഭിനയം കൊണ്ടും പ്രേക്ഷകനെ ആഴത്തിൽ സ്പർശിക്കുന്ന ഒരു സിനിമാനുഭവം"- ഒറ്റവാചകത്തിൽ ഈ ടുണീഷ്യൻ സിനിമയെ അങ്ങനെ വിശേഷിപ്പിക്കാം. തീവ്രവാദം വ്യക്തിയിലും, കുടുംബത്തിലും, സമൂഹത്തിലും ഏൽപ്പിക്കുന്ന ആഘാതങ്ങളെ സൂക്ഷ്മതലത്തിൽ ഒരു ടുണീഷ്യൻ കുടുംബത്തിന്റെ പശ്ചാത്തലത്തിൽ അവതരിപ്പിക്കുന്നു ഈ സിനിമ. AICHA-BRAHIM ദമ്പതികളുടെ മൂന്ന് ആൺമക്കളിൽ രണ്ടുപേർ isis-ൽ ചേരാൻ പോകുന്നതോടെ കുടുംബാന്തരീക്ഷം താളം തെറ്റുന്നു. അതിൽ ഒരാളുടെ മാത്രം മടങ്ങിവരവ് കുടുംബത്തെ കൂടുതൽ സംഘർഷങ്ങളിലേക്ക് വഴിനടത്തുന്നതിനോടൊപ്പം ഉത്തരം കിട്ടാത്ത ധാരാളം ചോദ്യങ്ങളും അവശേഷിപ്പിക്കുന്നു. AICHA-യുടെ തോന്നലുകൾ, സ്വപ്‌നങ്ങൾ, തേടലുകൾ, ചിന്തകൾ എന്നിവയ്‌ക്കൊപ്പം നമ്മളും യാത്രചെയ്യുമ്പോൾ മകനെ പൊതിഞ്ഞു നിൽക്കുന്ന നിഗൂഢതയ്ക്ക് പിന്നിലുള്ള സത്യങ്ങളെ വെളിച്ചത്തിലേക്ക് നീക്കിനിർത്താൻ നമുക്കും സാധിക്കുന്നു. യാഥാർത്ഥവും, അയഥാർത്ഥവുമായ ഇമേജുകൾ നിറയുന്ന ഫ്രെയിമുകളോട് ചേർന്ന് നിൽക്കുന്ന പശ്ചാത്തലസംഗീതവും സിനിമയെ മികച്ച ദൃശ്യാനുഭവമാക്കുന്നു.

PRAYERS FOR THE STOLEN (2021)

 FILM : PRAYERS FOR THE STOLEN (2021)

GENRE : DRAMA

COUNTRY : MEXICO

DIRECTOR : TATIANA HUEZO

            സമൂഹത്തെ ഗ്രസിക്കുന്ന അസ്വസ്ഥതകളും, കൊള്ളരുതായ്മകളും അവിടങ്ങളിലെ കുട്ടികളുടെ നിഷ്കളങ്കമായ ബാല്യകാലത്തെയും , സന്തോഷങ്ങളെയും അപഹരിക്കുന്ന കാഴ്ച ലോകത്തിന്റെ ഏത് കോണിലും വ്യത്യസ്തമല്ല എന്ന ഓർമ്മപ്പെടുത്തലാകുന്നു ഈ മെക്സിക്കൻ സിനിമ.

         അന, മരിയ, പൗള എന്നീ 3 പെൺകുട്ടികളുടെ സൗഹൃദവും, ജീവിതവും മുൻനിർത്തി ഒരു മെക്സിക്കൻ മലയോര ഗ്രാമത്തിലെ സാമൂഹികാവസ്ഥയെ അടയാളപ്പെടുത്തുന്നു ഈ സിനിമ. അഴിമതി, മയക്കുമരുന്നു മാഫിയ, മിലിട്ടറി, തട്ടിക്കൊണ്ടുപോകൽ എന്നിങ്ങനെയുള്ള ആകുലതകളുടെ മേഘം എല്ലായ്പ്പോഴും തങ്ങിനിൽക്കുന്ന സാമൂഹിക ചുറ്റുപാടുകളിൽ ഇവരുടെ നിറംകെട്ട ബാല്യം ഭീതിയോടെ കിതച്ചും, പകച്ചും നിൽക്കുന്നു. കുട്ടികൾക്കൊപ്പം സ്വസ്ഥതയിലേക്ക് വളരാതെ സമൂഹം മാറ്റമില്ലാതെ തുടരുമ്പോൾ ആശങ്കകളുടെ കൂട്ട് ഒഴിയുന്നുമില്ല. നിരാശ ആവേശിച്ച മുഖങ്ങളും, ഭയം തളം കെട്ടിനിൽക്കുന്ന മനസ്സും പേറി ജീവിതം തള്ളിനീക്കുന്ന അമ്മമാരുടെ പ്രതിനിധിയാകുന്നു പൗളയുടെ അമ്മ. പതിഞ്ഞ താളത്തിൽ ദൃശ്യഭംഗിയോടെ അവതരിപ്പിച്ചിരിക്കുന്ന സിനിമ നിവർത്തിവെയ്ക്കുന്ന യാഥാർത്യങ്ങൾ, സിനിമ കാലൂന്നുന്ന സാമൂഹിക പരിസരങ്ങളെ ഇന്നും വിട്ടൊഴിഞ്ഞിട്ടില്ല എന്നത് അസ്വസ്ഥതയേകുന്നു.