THE PRESIDENT’S CAKE (2025)

FILM : THE PRESIDENT’S CAKE (2025)

GENRE : DRAMA

COUNTRY : IRAQ

DIRECTOR : HASAN HADI

            1990-കളിലെ ഇറാഖിന്റെ രാഷ്ട്രീയ-സാമൂഹിക സാഹചര്യങ്ങളെ വേറിട്ട രീതിയിൽ അടയാളപ്പെടുത്തുന്ന മികച്ച സിനിമ കാഴ്ചയാണ് THE PRESIDENT'S CAKE. ലാമിയ എന്ന പെൺകുട്ടിയുടെ ജീവിത സാഹചര്യങ്ങളിലേക്ക് ക്യാമറ തിരിക്കുമ്പോൾ ദൃശ്യമാകുന്നത് ആ കാലഘട്ടം തന്നെയാകുന്നു. പ്രസിഡന്റിന്റെ ജന്മദിനം ആഘോഷിക്കുന്നത് നിർബന്ധിതമാകുന്ന അവസ്ഥയിൽ സ്‌കൂളിലേക്ക് കേക്ക് ഉണ്ടാക്കിക്കൊണ്ടുവരാനുള്ള ചുമതല നറുക്കെടുപ്പിലൂടെ ലാമിയയിൽ അടിച്ചേല്പിക്കപ്പെടുകയാണ്. പ്രായാധിക്യം ബാധിച്ച മുത്തശ്ശിയോടൊപ്പം ഇല്ലായ്മകളെ കൂട്ടുപിടിച്ചു ജീവിക്കുന്ന ലാമിയക്ക് അതിനാവശ്യമായ സാധനങ്ങൾ സംഘടിപ്പിക്കുകയെന്നത് അത്യധികം പ്രയാസവുമാണ്. സാധനങ്ങൾ സംഘടിപ്പിക്കാനുള്ള ശ്രമങ്ങളുടെ ഭാഗമായുണ്ടാകുന്ന സംഭവങ്ങളാണ് സിനിമയുടെ പ്രമേയം.

         സ്വാച്ഛാധിപത്യത്തിന്റെ ഭീഷണികൾ എങ്ങനെ പടർന്ന് താഴെത്തട്ടിലെത്തുന്നു എന്നത് അധ്യാപകന്റെ വാക്കുകളിൽ തെളിഞ്ഞു നിൽക്കുന്നു. എല്ലാ നിലയ്ക്കും അസ്ഥിരമായ സാമൂഹിക പരിതസ്ഥിതി അഴിമതിക്കും, കുറ്റകൃത്യങ്ങൾക്കും, ചൂഷണങ്ങൾക്കും സുലഭമായി അവസരങ്ങളും ഇടങ്ങളും സൃഷ്ടിക്കുമെന്ന യാഥാർത്യവും സിനിമ പറഞ്ഞുവെയ്ക്കുന്നു. സ്വാച്ഛാധിപത്യത്തിന്റെ അച്ചുകളിലേക്ക് പരുവപ്പെട്ട ഒരു ജനതയെ രാജ്യത്തിൻറെ ശബ്ദമുഖരിതമായ തെരുവുകളിലെങ്ങും കാണാനാവുന്നു. കണ്ണ് നഷ്ട്ടപ്പെട്ടതു കാരണം ഭാര്യയുടെ സൗന്ദര്യത്തെക്കുറിച്ചു വേവലാതിപ്പെടേണ്ടതില്ലല്ലോ എന്ന് ആശ്വസിക്കുന്ന സൈനികന്റെ മനസ്സും മറ്റൊന്നല്ല നമുക്ക് കാണിച്ചുതരുന്നത്. മിനിമലിസ്റ്റിക്കായ പശ്ചാത്തല സംഗീതവും, മികച്ച സിനിമാറ്റോഗ്രാഫിയും , അഭിനേതാക്കളുടെ നല്ല പ്രകടനവും സിനിമയെ ഒരു മികച്ച അനുഭവമാക്കുന്നു.

ATLANTIS (2019)

 FILM : ATLANTIS (2019)

GENRE : DRAMA !!! WAR

COUNTRY : UKRAINE

DIRECTOR : VALENTYN VASYANOVYCH

    WAR GENRE സിനിമകളിലെ സ്ഥിരം കാഴ്ചകളിൽ നിന്ന് വിഭിന്നമായ അന്തരീക്ഷവും , ഗതിയുമാണ് ATLANTIS എന്ന യുക്രൈൻ സിനിമയ്ക്കുള്ളത്. യുദ്ധാനന്തര മനഃസംഘർഷങ്ങൾ പേറി നടക്കുന്ന സെർജി എന്ന മുൻ സൈനികനെ ചുറ്റിപ്പറ്റിയാണ് സിനിമ നീങ്ങുന്നത്. യുദ്ധത്തിൻ്റെ  ബാക്കിപത്രമെന്നോണം മനുഷ്യവാസ യോഗ്യമല്ലാതായിപ്പോയ പ്രദേശത്തെ കാഴ്ചകൾ  സെർജി ചെയ്യുന്ന വിവിധ ജോലികളോടൊപ്പം ഫ്രെയിമുകൾ കയ്യടക്കുമ്പോൾ യുദ്ധം എന്താണ് അവശേഷിപ്പിക്കുന്നത് എന്നതിന് അടിവരയിടുന്നു. പാകിയ മൈനുകൾ കണ്ടെത്താനുള്ള സൈനികരുടെ ശ്രമങ്ങളും, യുദ്ധത്തിൽ കാണാതായവരെ കണ്ടെത്താനുള്ള ഉദ്ഖനനങ്ങളും, അവയുടെ ഓട്ടോപ്സിയുമെല്ലാം യുദ്ധാന്തര ലോകത്തിൻ്റെ നേർകാഴ്ചകളാവുന്നു. യുദ്ധം ആവേശിച്ച നേതൃമനസ്സുകൾ സൃഷ്ടിക്കുന്ന ക്രൂരതകളും, ഭീകരതകളും മാനവരാശിയുടെ നിലനിൽപ്പിനെ തന്നെ പ്രതിസന്ധിയിലാക്കുന്ന സമകാലിക ലോകത്തും / എല്ലാ കാലത്തും പ്രസക്തമാണ് ഈ സിനിമയുണർത്തുന്ന ചിന്തകൾ ......

THE GRAVEDIGGER'S WIFE (2021)

 FILM : THE GRAVEDIGGER'S WIFE (2021)

COUNTRY : SOMALIA

GENRE : DRAMA

DIRECTOR : KHADAR AYDERUS AHMED

     ആഫ്രിക്കൻ സിനിമകളിലെ ദൃശ്യങ്ങൾ എപ്പോഴും വേറിട്ട അനുഭവമേകുന്നവയാണ്. നമ്മുടെ  കാഴ്ചകൾക്കും  ചിന്തകൾക്കും അന്യമായ പ്രതലങ്ങളിലാണ് അവയിലെ കഥാപാത്രങ്ങളും അവരുടെ ജീവിതങ്ങളും നിലകൊള്ളുന്നത്. സന്തോഷത്തിന്റെ അരണ്ട വെളിച്ചം പോലും അകന്നു നിൽക്കുന്ന കാഴ്ചകളാണ് ആഫ്രിക്കൻ സിനിമകൾ പലപ്പോഴും സമ്മാനിക്കാറുള്ളത്. 

          ഈ  സിനിമ ശവക്കുഴിയെടുത്ത് ജീവിക്കുന്ന ഗുലാദിൻ്റെയും കുടുംബത്തിൻ്റെയും കഥയാണ്. തൻ്റെ ഭാര്യയുടെ ജീവൻ രക്ഷിക്കുന്നതിനാവശ്യമായ ഓപ്പറേഷന്‌ പണം കണ്ടെത്താനുള്ള ശ്രമങ്ങളിലാണ് അയാൾ. ഹോസ്പിറ്റലിന് സമീപം തമ്പടിച്ചിരിക്കുന്ന സഹജോലിക്കാരിലൊരാൾ നിരാശയോടെ  പറയുന്ന , " ഇന്ന് ഒരാൾ പോലും മരിച്ചില്ല" എന്ന കറുത്ത ഹാസ്യത്തിൽ ഗുലാദിൻ്റെ മാത്രമല്ല ഒരു ജനതയുടെ ദൈന്യതയെ കണ്ടെടുക്കാം. ജീവിത സാഹചര്യങ്ങളാൽ പ്രതീക്ഷകളറ്റു പോകുന്ന ജീവിത യാഥാർഥ്യങ്ങളെ മുൻനിർത്തി  മനസ്സിനെ വൈകാരികമായി സ്പർശിക്കുന്ന ഒരു മികച്ച ദൃശ്യാനുഭവം തന്നെയാണ് THE GRAVEDIGGER'S WIFE .

RAUF (2016)

 FILM  : RAUF (2016)

COUNTRY : TURKEY

GENRE : DRAMA !!! WAR !!! ROMANCE

DIRECTOR : SONER CANER , BARIS KAYA

        കുർദിഷ് പശ്ചാത്തലമുള്ള സിനിമകളെ യുദ്ധത്തിന്റെ നിഴലുകളിൽ നിന്ന് അടർത്തി നിർത്തുക അസാധ്യമാണെന്നിരിക്കെ ഈ സിനിമയും നിശ്വസിക്കുന്നത് യുദ്ധത്തിന്റെ വിഹ്വലതയും, നിശ്ശബ്ദതകളും തന്നെയാണ്. കുട്ടികളും, പ്രായമായവരും മാത്രം കാഴ്ച്ചയിൽ വരുന്ന ഒരു കുർദ്ദിഷ് മലയോര ഗ്രാമത്തിന്റെ മഞ്ഞുപുതഞ്ഞ പശ്ചാത്തലമാണ് സിനിമയ്ക്കുള്ളത്. ആഭ്യന്തരയുദ്ധം വെടിയൊച്ചകളുടെ പ്രകമ്പനങ്ങളായി ചേർന്നുനിൽക്കുന്ന ഗ്രാമീണതയിൽ സ്‌കൂൾ പഠനം നിർത്തി ആശാരിയുടെ സഹായിയായി പണി പഠിക്കുന്ന റൗഫിനൊപ്പം നമ്മളും ചേരുന്നു, കാരണം അവന്റെ കാഴ്ചകളാണ് സിനിമയുടെ കാഴ്ചകൾ. അവന്റെ കാഴ്ചകളിലൂടെയും, പ്രണയ ചിന്തകളിലൂടെയും സിനിമ മുന്നോട്ടായുമ്പോൾ യുദ്ധത്തിന്റെ വേദനകൾ കാഴ്ചക്കാരനിലേക്ക് നിശബ്ദമായി സംവദിക്കപ്പെടുന്നുണ്ട്. പ്രായവും,  ഉയരവും, ഭാരവും മരണത്തിന്റെ വിളംബരമാകുമ്പോൾ "കാരണം" മലനിരകളിൽ ഒളിഞ്ഞിരിക്കുന്ന യാഥാർത്യമായാണ് നമ്മിലേക്ക്‌ പടരുന്നത്. പതിഞ്ഞ താളത്തിൽ മനോഹരമായ ഭൂപ്രകൃതിയിൽ സാഹചര്യങ്ങൾക്കൊപ്പം താളാത്മകമായി സ്പന്ദിക്കുന്ന സംഗീതവും കലർന്ന ഒരു സിനിമ.

WHERE THE WIND COMES FROM (2025)

 FILM    : WHERE THE WIND COMES FROM (2025)

GENRE : DRAMA !!! ROAD MOVIE

COUNTRY : TUNISIA

DIRECTOR : AMEL GUELLATY

     WHERE THE WIND COMES FROM എന്ന ടുണീഷ്യൻ സിനിമ സൗഹൃദവും പുതുതലമുറയുടെ പ്രതീക്ഷകളും ഇന്ധനമാകുന്ന മനോഹരമായ ഒരു റോഡ് മൂവിയാണ്. Rebellious-ആയ അലീസയോടൊപ്പമുള്ള യാത്ര ഒന്നിനു പിറകെ മറ്റൊന്നായി പ്രശ്നങ്ങളെ ക്ഷണിച്ചു വരുത്തുമ്പോഴും, മെച്ചപ്പെട്ട ഒരു ഭാവി എന്ന പ്രതീക്ഷയും, അവളോടുള്ള സൗഹൃദവുമാണ് മെഹ്ദി എന്ന ചിത്രകാരനെ മുന്നോട്ടു നയിക്കുന്നത്. ടുണീഷ്യയിൽ നിന്ന് പുറത്തുകടക്കാൻ മെഹ്ദിക്ക് കൈവന്ന  അവസരം സ്വന്തമാക്കാൻ ഒരു മത്സരത്തിൽ പങ്കെടുക്കാനാണ് ഇരുവരുടെയും യാത്ര. അതിരില്ലാത്ത പ്രതീക്ഷയും, അരക്ഷിതമായ സാഹചര്യങ്ങളുമെല്ലാം പല അനിവാര്യതകളിലേക്കും അവരെ കാലെടുത്തുവെയ്പ്പിക്കുന്നു. ടുണീഷ്യയിലെ രാഷ്ട്രീയ, സാമൂഹിക സാഹചര്യങ്ങൾ  സാന്നിധ്യമായി കഥാപാത്രങ്ങളിലും, അവരുടെ ചിന്തകളിലും, അവരുടെ ചുറ്റുപാടുകളിലും നിഴൽ വീഴ്ത്തുന്നതായി കാണാം. സന്തോഷവും, സങ്കടങ്ങളും, പ്രയാസങ്ങളും, തിരിച്ചറിവുകളുമെല്ലാം നിറഞ്ഞ യാത്രയിലെ സംഭാഷണങ്ങൾക്കിടയിൽ ഇരുകഥാപാത്രങ്ങളും കൂടുതൽ തെളിമയാർജ്ജിക്കുന്നുണ്ട്. മികച്ച സിനിമാട്ടോഗ്രഫിയും, സംഗീതവും സിനിമയ്ക്ക് മുതൽക്കൂട്ടാവുന്നു .

DJ AHAMET (2025)

 FILM : DJ AHAMET (2025)

GENRE : COMEDY !!! DRAMA

COUNTRY : NORTH MACEDONIA

DIRECTOR : GEORGI M UNKOVSKI

       ഒരു നോർത്ത് മാസിഡോണിയൻ ഉൾഗ്രാമത്തിന്റെ പശ്ചാത്തലത്തിൽ കഥപറയുന്ന മനോഹരമായ  സിനിമയാണ് DJ AHAMET. അവിടത്തെ ഗ്രാമീണ ജീവിതത്തിന്റെ  സാംസ്‌കാരിക അംശങ്ങൾ നിറഞ്ഞു നിൽക്കുന്ന സിനിമയിൽ സംഗീതവും ഒരു പ്രധാന കഥാപാത്രമായി നിലകൊള്ളുന്നു. അഹമ്മദും, പിതാവും, സംസാരിക്കാത്ത അനിയനും അടങ്ങുന്ന കുടുംബം ചെമ്മരിയാടുകളെ വളർത്തിയും, പുകയില വിറ്റുമാണ്‌ ഉപജീവനം നടത്തുന്നത്. ഗ്രാമത്തിലേക്ക് പുതുതായി വരുന്ന അയ എന്ന പെൺകുട്ടിയും അഹമ്മദും പ്രണയിതരാകുന്നതിന്  പിറകിൽ  അവരുടെ അഭിരുചികളും കാരണമാകുന്നുണ്ട്. ഗ്രാമീണതയുടെ എല്ലാ ദൃശ്യസൗന്ദര്യവും കാണാനാവുന്നതോടൊപ്പം യാഥാസ്തികതയുടെ അതിരുകളും, വേലിക്കെട്ടുകളും പലവിധത്തിൽ സിനിമയിൽ സാന്നിധ്യമാകുന്നുണ്ട്. സംഗീതവും, നൃത്തവും, പ്രണയവുമെല്ലാം ചിട്ടവട്ടങ്ങൾക്ക് പുറത്താകുന്ന സാമൂഹികക്രമത്തിൽ , അത്തരം കാഴ്ചപ്പാടുകൾക്ക് മേലെ പറക്കാൻ 'അയക്കും' , അഹമ്മദിനും കഴിയുമോ എന്നത് സിനിമയിൽ നിന്ന് തന്നെ കണ്ടറിയുന്നതാണ് ഉചിതം.....  

IN THE LAND OF BROTHERS (2024)

 FILM : IN THE LAND OF BROTHERS (2024)

COUNTRY : IRAN

GENRE : DRAMA

DIRECTOR : RAHA AMIRFAZLI , ALIREZA GHASEMI

    യുദ്ധങ്ങളും, രാഷ്ട്രീയ അസ്ഥിരതകളുമെല്ലാം മനുഷ്യനെ തള്ളിയിടുന്നത് പലതരം ജീവിതാവസ്ഥകളിലേക്കാണ്. സങ്കല്പിക്കാനാവാത്ത ജീവിതപരിസരങ്ങളിൽ എരിഞ്ഞു തീരുവാനും, അടയാളങ്ങളില്ലാതെ അലിഞ്ഞു തീരുവാനും വിധിക്കപ്പെട്ട നിരവധി ജീവിതങ്ങളേയും മനുഷ്യാവസ്ഥകളെയും ഓർമിപ്പിക്കുന്നു ഇറാനിയൻ സിനിമയായ IN THE  LAND OF BROTHERS. 

    അഭയാർത്ഥി ജീവിതത്തിന്റെ പലതരം ദുർഘട സന്ധികളിലൂടെ സഞ്ചരിക്കുന്ന സിനിമ വിവിധ ദശകങ്ങളിലേയ്ക്ക് കാലൂന്നുമ്പോഴും  ആശങ്കകളും, സ്വത്വ പ്രതിസന്ധികളുമെല്ലാം കഥാപാത്രങ്ങളെ നിഴലുപോലെ പിന്തുടരുന്നു എന്ന യാഥാർഥ്യം തെളിഞ്ഞു നിൽക്കുന്നു. പരസ്പര ബന്ധമുള്ള മൂന്നു കഥാപാത്രങ്ങളുടെ ജീവിതങ്ങളെ വ്യത്യസ്ത ടൈംലൈനിൽ അവതരിപ്പിക്കുന്നതിലൂടെ അഭയാർത്ഥി ജീവിതങ്ങളുടെ സാമൂഹികമായ പരിണാമവും അനാവൃതമാകുന്നു. മുഹമ്മദും, ലൈലയും, ക്വസവുമെല്ലാം നടന്നു തീർത്ത പാതകളിൽ ദുഃഖസാന്ദ്രമായ ശേഷിപ്പുകൾക്കപ്പുറം ജീവിതത്തിന്റെ  വർണ്ണങ്ങളെ കണ്ടുമുട്ടാനാവുന്നില്ല. സാഹചര്യങ്ങൾ അടിച്ചേൽപ്പിച്ച അവരുടെ ജീവിതത്തിലെ നിസ്സഹായതയുടെ / നിരാശയുടെ / തകർന്ന സ്വപ്നങ്ങളുടെ / അസ്തമിച്ച പ്രതീക്ഷകളുടെയെല്ലാം  പതിഞ്ഞ തേങ്ങലുകൾ അവരിൽ തന്നെയൊടുങ്ങുന്നു.

    ചൂഷണങ്ങളും , നഷ്ടങ്ങളും, വേദനകളുമെല്ലാം ജീവശ്വാസം പോലെ ഒപ്പം നടക്കുന്ന അഭയാർത്ഥി ജീവിതത്തിന്റെ  വേറിട്ട കാഴ്ചകളിലേക്ക് ക്യാമറ തിരിക്കുന്ന ഈ സിനിമ  മനസ്സിൽ ഒരു നൊമ്പരമായി അവശേഷിക്കുന്നു. കഥാപാത്രങ്ങളുടെ മികച്ച പ്രകടനങ്ങളും, അളന്നു മുറിച്ച സംഭാഷണങ്ങളും , മികച്ച സിനിമാറ്റോഗ്രഫിയും, ശ്രദ്ധയാകർഷിക്കുന്ന സൗണ്ട് ട്രാക്കുമെല്ലാം ഈ സിനിമയെ മികച്ച ദൃശ്യാനുഭവമാക്കുന്നു.