LAKE TAHOE (2008)

FILM : LAKE TAHOE (2008)

COUNTRY : MEXICO

GENRE : DRAMA

DIRECTOR : FERNANDO EIMBCKE

               പശ്ചാത്തല സംഗീതത്തിന്റെ അഭാവത്തിനിടയിലും , സ്റ്റാറ്റിക് ഷോട്ടുകളുടെ ആധിക്യത്തിനിടയിലും LAKE TAHOE എന്ന മെക്സിക്കൻ സിനിമ എന്നെ ബോറടിപ്പിച്ചില്ല. നിശ്ചലമായ ക്യാമറയും, ഇരുൾ മൂടുന്ന ഫ്രൈമുകളും, ദുർലഭമായ സംഭാഷണങ്ങളും, നിർവ്വികാരത തളം കെട്ടിയ പ്രധാന കഥാപാത്രവും ആഖ്യാനത്തിന്റെ സൗന്ദര്യത്തിനും EFFECTIVENESS-നും മുതൽകൂട്ടായതായി തോന്നി.
               റോഡിനരികിലുള്ള പോസ്റ്റിലിടിക്കുന്ന തന്റെ കാർ നന്നാക്കാൻ ശ്രമിക്കുന്ന ജുവാൻ എന്ന യുവാവിന്റെ ഒരു ദിവസമാണ് ഈ സിനിമയിൽ കാണാനാവുക. കാർ നന്നാക്കാനുള്ള ശ്രമങ്ങൾക്കിടയിൽ ജുവാൻ കണ്ടുമുട്ടുന്ന ആളുകളും , എതിരിടുന്ന സംഭവങ്ങളും അവന്റെ മനസ്സിനെ എങ്ങനെ സ്വാധീനിക്കുന്നു എന്നതാണ് സിനിമയുടെ മർമ്മം. ജുവാന്റെ അസ്വസ്ഥതയുടെ കാരണവും, അതിനെ മറികടക്കാനുള്ള വൈകാരികമായ സമരസപ്പെടലിലേക്ക് നയിക്കുന്ന സാഹചര്യങ്ങളും ഒരു ക്യാരക്ടർ സ്റ്റഡിയുടെ തലത്തിലേയ്ക്ക് സിനിമയെ ഉയർത്തുന്നു.
                    തീവ്രമായ കഥാസന്ദർഭങ്ങൾ ഒരുക്കി പറയാവുന്ന ഒരു തീം ലളിതമായി പറയാൻ കഴിഞ്ഞു എന്നതാണ് ഈ സിനിമയുടെ സവിശേഷത. സിനിമയിലെ ഹാസ്യത്തിന്റെ അംശമായ യുവ മെക്കാനിക്കിന്റെ വാക്കുകൾ  പോലും പ്രമേയത്തോട് ചേർത്ത് വായിക്കുമ്പോൾ വളരെ പ്രസക്തമാവുന്നു. പ്ലോട്ട് ട്വിസ്റ്റുകളോ, ചടുലതയോ ഇല്ലാത്ത ഈ സിനിമ എല്ലാവരെയും രസിപ്പിക്കുന്ന ഒന്നാണെന്ന് തോന്നുന്നില്ല. വ്യത്യസ്തങ്ങളായ ലോകസിനിമകൾ തേടി നടക്കുന്നവർ ഈ സിനിമ കാണാതെ പോവുന്നത് നഷ്ടവുമാണ്.