RACHIDA (2002)

FILM : RACHIDA (2002)

COUNTRY : ALGERIA

GENRE : DRAMA

DIRECTOR : YAMINA BACHIR

                   നിസ്സഹായതയുടെ നിലവിളികളും  ചിതറിയ ശരീരങ്ങളുമാണ്‌ ഇന്നത്തെ പുലരികൾ സമ്മാനിച്ചു കൊണ്ടിരിക്കുന്നത്. ഭീകരവാദം സൃഷ്ടിക്കുന്ന ചോരച്ചാലുകൾ രാജ്യാതിർത്തികൾ ലംഘിച്ച് ഒഴുകി പടരുകയാണ്. വെടിയൊച്ചകളുടെ  ഉച്ച-നീച സ്ഥായികൾക്കിടയിൽ ഭീതിയുടെ മൌനം തളം കെട്ടിനിൽക്കുന്നു. ഭീകരവാദത്തിന്റെ ക്രൂരതകളിൽ  വിറങ്ങലിച്ച്, ആശയറ്റു കഴിയുന്ന ഒരു ജനതയുടെ നിശബ്ദ രോദനമാകുന്നു അൾജീരിയൻ സിനിമയായ RACHIDA. ആഭ്യന്തര പ്രശ്നങ്ങളിൽ നീറിപ്പുകഞ്ഞ അൾജീരിയയുടെ ഇന്നലേകളുടെ പശ്ചാത്തലത്തിൽ ഭീകരവാദത്തെ RACHIDA  എന്ന യുവ അധ്യാപികയുടെ കണ്ണുകളിലൂടെ നോക്കിക്കാണുകയാണ് ഈ സിനിമ. പ്രത്യേക പരിണാമങ്ങളിലേയ്ക്ക് ചുവടു വെയ്ക്കാത്ത സിനിമയുടെ ഉള്ളടക്കം, തീവ്രവാദം സൃഷ്ടിക്കുന്ന ദുരിതങ്ങളേയും, ഭീതിയെയും, ജനങ്ങളുടെ മാനസിക നിലകളെയുമാണ്  (TRAUMA)  വലം വെയ്ക്കുന്നത്. സിനിമയിലെ സംഭവ വികാസങ്ങൾക്ക്‌ പശ്ചാത്തലമാകുന്ന ഗ്രാമത്തെ അത് നിലകൊള്ളുന്ന രാഷ്ട്രത്തിന്റെ അവസ്ഥയായി വ്യക്തതയോടെ വായിച്ചെടുക്കാം. പിച്ചി ചീന്തപ്പെടുന്ന സ്ത്രീത്വവും, നിലവിളികളായി മാറുന്ന ആഘോഷരാവുകളും, ധ്വംസിക്കപ്പെടുന്ന അവകാശങ്ങളും ശപിക്കപ്പെട്ട നാടിന്റെ നിഴലുകളാകുന്നു. കാലത്തിനു പോലും മായ്ക്കാനാവാത്ത മുറിവുകൾ മനസ്സിലാഴ്ത്തി വെറുപ്പിന്റെ വിത്തുകൾ പാകി മാനവികതയെ ചുട്ടെരിക്കുന്ന ഭീകരതയുടെ തേർവാഴ്ച്ചകളെ മനസ്സുകൊണ്ടും, ശരീരം കൊണ്ടും പ്രതിരോധിക്കാൻ നമുക്ക് കഴിയട്ടെ. ദൈന്യതയും, ഭീതിയും വഴിമാറിയ RACHIDA-യുടെ മനോഹരങ്ങളായ കണ്ണുകൾ പറയുന്നതും ഇക്കാര്യം തന്നെയാണെന്ന് അനുമാനിക്കാം.